عمرك حبيت حد أكـتر من نفسك لدرجة إنك بتفضل تبعد عنه ولا إنك تعيش معاه (نص عمر)؟
ايوه نص عمر...
لما القدر يحكم عليك إنك تعيش نص عمر ومفيش في إيدك حاجه تتعمل غير إنك تستنى قدرك بفارغ الصبر...
لما يتحكم عليك إنك تموت ألف مره كل يوم عشان مش قادر تنسى تعبك ده ولا قادر تختار غيره...
عمرك حسيت إنك مخنوق ومظلوم ومش قادر تدافع عن نفسك قدام الإنسان اللي كان في يوم من الأيام حياتك وشمسك وقمرك؟
صدقوني أصعب إحساس في الدنيا إن الإنسان يكون مظلوم ومش قادر يدافع عن نفسه ولا يتكلم...
صعب أوي إحساس الخيانه اللي ممكن حبيبتك تتهمك بيه...
والأصعب إنها ممكن تقول لك كلام جارح وممكن كمان تشتمك ولا كإنك واحد غريب عنها بدون أي إحترام للمشاعر اللي بينكم ولا تفرق معاها حاجه...
إيه يعني لما إنسان يتعب ويختار يبعد عن حبيبته عشان مش قابل يعيش معاها بحالة (النص عمر)...
لكن أنا عن نفسي عشان بحبها بجد إخترت البعد ومش مشكله بالنسبه لي اللي بيحصل لي لإني بعتبر إن ده تمن إخلاصي وحبي ليها وتضحيتي عشانها وعشان مش قابل أعيش معاها حالة النص عمر...
هي بقى تقدر تفهم أسباب قراري ده أو لأ هي حره بس ده مش معناه إنها تجرحني بالكلام أو بالفعل...
وأنا عارف إنكم هتقولوا الأعمار بيد الله...
بس حط نفسك أو حطي نفسك مكاني هتعمل إيه أو هتعملي إيه؟
إنت لو مكاني وبتحب حبيبتك بجد هتختار إيه؟؟
تعيش مع حبيبتك بحالة النص عمر وتعذبها وإنت من الأول عارف إنك تعبان ومش هتقدر تحقق ليها كل اللي بتتمناه...
ولا تبعد عنها وتختار الموت البطيء لوحدك وتتحمل عذابك وألم بعادك عنها ده غير إهانتها وظلمها ليك وإتهامك بالخيانه كل لحظه...
هتختار إيه بذمتك؟
هتختاري إيه لو عرفتي إنك تعبانه وبتحبي حبيبك بجد ومتأكده إنك مش هتقدري تحققي لحبيبك كل اللي بيتمناه؟
هتفضلي معاه ولا هتبعدي عنه أرحم؟
يا ريت تجاوبوني بصراحه وأعرف رأي كل إنسان أو إنسانه لو لا قدر الله إتعرض للموقف ده...
وبتمنى إن موضوعي ميكونش مصيره الحذف لإني بغض النظر عن إني بحكي حكايتي لكن بعرض مشكله ممكن تحصل لأي شخص فينا...
تحياتى/
Mr.LeTo
موضوع: عمرك جربت تضحي؟ 
04/10/10, 05:31 pm
